Stgaffir cultura tutga tar l'uman. La participaziun a l'art ed a la cultura en la musica ed en il mund musical dal mintgadi pussibilitescha d'entrar en contact cun auters umans sin plaun musical e da communitgar sur ils cunfins culturals ora. La musica enconuscha bleras furmas e blers stils. Ordaifer la scola tgiran ils uffants e giuvenils fitg differentas praticas musicalas che vegnan furmadas era da las influenzas biograficas e culturalas. Tras l'occupaziun cun la tradiziun musicala e cun l'innovaziun era en la lavur musicala contemporana entran las scolaras ed ils scolars en in dialog cun l'atgna persuna e cun la societad ed emprendan da sa mover suveranamain en in mund da viver, nua che la musica è omnipreschenta en differentas furmas e funcziuns.
Entaifer la scola sco lieu d'emprender e da cultura presta l'instrucziun musicala ina contribuziun impurtanta a la furmaziun culturala, tras quai ch'ella pussibilitescha a tut ils uffants e giuvenils da furmar e da meglierar in giudicament estetic e d'ir enturn activamain cun la musica. La finamira surordinada è ina furmaziun musicala fundamentala ch'è orientada a la promoziun da la creativitad, ad abilitads performativas ed al senn estetic sco era a l'intermediaziun d'enconuschientschas da l'art e da la cultura.
Plinavant sa porscha la pussaivladad che pliras classas lavuran ensemen e ch'ins tira a niz purschidas da l'intermediaziun da cultura en il sectur da la musica (p.ex. concerts da scolaras e scolars, emnas da project, festas da musica). Las scolaras ed ils scolars gidan uschia a concepir activamain il mintgadi da scola e la cultura da la chasa da scola.
L'instrucziun musicala en la scola populara garantescha in access unic a la furmaziun culturala e sa basa sin ina chapientscha da musica che cumpiglia era ritmica/musica e moviment sco era elements dal saut. Ella porscha a las scolaras ed als scolars la pussaivladad da s'occupar a moda multifara cun sasezs, la gruppa e l'ambient cultural. La motivaziun per in process musical constructiv e duraivel en quai che reguarda l'exercitar e l'emprender resulta en emprima lingia dad experientschas positivas cun la musica e dal plaschair da la musica. Sentir e differenziar l'expressiun musicala sco era s'inscuntrar a moda receptiva e reflexiva cun la musica furman il fundament per sviluppar cumpetenza musicala. Quai capita cun ir enturn cun musica sa referind activamain a l'agir e cumpiglia l'experientscha da la vusch, da l'udida e dal corp, ma era l'experientscha instrumentala ed estetica sco era l'applicaziun da savida musicala.
La lavur vi da las cumpetenzas dal rom musica pussibilitescha da s'occupar cun furmas d'expressiun artisticas e culturalas s'orientond a l'agir ed a l'applicaziun. Las scolaras ed ils scolars fan experientschas musicalas s'occupond cuminaivlamain ed a moda multifara cun musica.
